Spente førsteklassingar starta skulegangen

Både førsteklassingar, foreldre og tilsette ved skulane i Surnadal kommune var litt ekstra spente måndag. Då var det nemleg første skuledag - ein merkedag i dei unge elevane sine liv.

Ved Bøfjorden og Bæverfjord oppvekstsenter vart førsteklassingane Leander Haarstad Bøe, Emrik Haugen Nessæther og Mia Hoås Aarnes godt tekne imot av einingsleiar Arne Henning Johnsen.

Han ønska dei tre velkommen, og elevane fann raskt plassane sine i klasserommet, som dei deler med andreklassingane.

Johnsen, kontaktlærar Irmelin Sande Holtan og engelsk-, musikk- og svømmelærar Elise Kristiane Einum presenterte seg og skulen, før ordførar Lilly Gunn Nyheim fekk ordet.

Nyheim gratulerte både elevar og foreldre med den store dagen, og ønska lykke til med skulegangen. Elevane let seg tydeleg fascinere av det staselege ordførarkjedet, og var heller ikkje tunge å be då ordføraren lurte på kva som var favorittmusikken deira.

– AC/DC og Metallica, kom det lynraskt frå ein av elevane, før fokuset gjekk over til om dei nye viskelæra elevane hadde fått utdelt var spiselege eller ikkje – ja, kanskje det til og med var godteri?

I det nye skuleåret 2019/2020 har Bøfjorden og Bæverfjord oppvekstsenter totalt 41 elevar.

Dei tre førsteklassingane ved Bøfjorden og Bæverfjord oppvekstsenter på første rekkje, frå venstre: Leander Haarstad Bøe, Emrik Haugen Nessæther og Mia Hoås Aarnes. Bak er ordførar Lilly Gunn Nyheim, saman med andreklassingane Jim Grepstad Bøklep, Bjørn Tore Svensli, Robin Alexander Aasgård Bøe, Ane Viktoria Engset Halle og Sólja Petersen.
 

Einingsleiar Arne Henning Johnsen ønska første- og andreklassingane velkomne. Elise Kristiane Einum (bak til venstre) skal ha engelsk, musikk og svømming med elevane.
 

Kontaktlærar Irmelin Sande Holtan og elevane følgjer med på at ordførar Lilly Gunn Nyheim ønskjer velkommen og gratulerer med dagen.
 

Lilly Gunn Nyheim, Arne Henning Johnsen, Elise Kristiane Einum og tre av elevane i den samanslåtte første- og andreklassen.