NM i eksteriørdømming av storfe under BU Landsstemne

Senior på Austistua Øye, Øyvind Holte, mellom søstrene Ingeborg og Guri Løfaldli Rindalsholt.

Holte fortel at reglane for kudømming er uendra frå da han sjølv deltok i tevlingar, men det var meir seriøst da. 
-  Vi måtte kvalifisere oss for å kunne representere Møre og Romsdal i landstevlinga.

I dag kan alle melde seg på, og med 230 deltakarar blir det lang tid å stå ute for kyrne. Dei var forresten ikkje så glade for å stå fastbundne. Dei trudde at dei skulle få gå og springe fritt når dei kom ut!

Dei frammøtte fekk først gjennomgang med opa dømming av ei ku. Dei 4 andre kyrne skal dei deretter dømme.

Konsentrerte kudommarar!

NBU-veteraner

Tradisjonen med tevlingar er gammel i Norges Bygdeungdomslag. Under NM i kudømming på Austistua Øye møtte vi vaksne tevlarar som mintes gamle dagar.

Holger Skei, Øyvind Holte og Nils Mogstad har mange tevlingar og BU-stemne bak seg.

I 1973 var stemnet på Jønsberg Landbruksskole, Stange, og da vart desse tre norgesmestrar i kudømming. Dei utgjorde Møre og Romsdal sitt lag i konkurransen, og alle vart innafor dei 6-7 første plassane.

På same stemnet vart Øyvind Holte norgesmester i traktorkjøring.

Øyvind Holte mintes ein kjent lokal heradsagronom som var ivrig med alt som hadde med husdyr å gjere, og særleg med kyr og kudømming. Og han lika konkurranse. Holte hugsa mellom anna desse to utsegnene frå heradsagronomen under ei kudømming:

-  Viss kua har horn, så skal horna vere jamne og symmetriske. Har ho ikkje horn skal du ikkje ta omsyn til det, sa heradsagronomen.

Ein annan situasjon:
-  Denne kua har alt for korte føter, like eins som eg!