Fotturar med Senioruniversitetet

Bildet viser styringsgruppa, frå venstre: Styrkår Brørs, Johanne Valsø Lervik, Eivind Hasle, Helene M.Nergård, Kåre Sæterbø

Senioruniversitetet for Indre Nordmøre (Rindal, Halsa og Surnadal) har lagt planar for 2 møte og ei ”kulturvandring” hausten 2011:

21.september på "Attanova", Rindalshuset i Rindal kl 1100-1300:
Åse Gullvåg Hasle, Meldal: Til fots som 8-åring frå Skagen til Nord-Italia i 1929.
Eit barndomsminne - til livslang inspirasjon og glede.

 

Åse Gullvåg Hasle er dotter til redaktøren og forfattaren Olav Gullvåg, som i april 1929 tok med seg heile familien (2 vaksne og 4 barn i alderen 4 til 14 år) for å vandre frå Skagen i Danmark til landsbyen Mori i Nord-Italia, der dei budde eit år. Åse Gullvåg Hasle var nest yngste barn i familien, fødd i 1920. Italia-turen var ei minnerik oppleving som har vore til livslang inspirasjon og glede, noko ho vil fortelje om. Faren, Olav Gullvåg, skreiv reisebrev til norske aviser og blad frå turen, og det vil bli gitt eksempel frå desse.

Laurdag 17.september ”Kulturvandring på Skei” (kl 1100- ca 1400)
Denne vandringa er ikkje primært for seniorar, men for alle som har interesse for utviklinga av Skei. Hovudvekta vil bli lagt på utviklinga frå jordbruksbygd til bygdeby, i tillegg til minne og minnesmerke frå krigen. Styrkår Brørs vil leie vandringa, og lokale kjentfolk vil delta. Ta med mat og kaffe – og lommelykt ! Gratis. Frammøte ved Kyrkjekontoret (Gamle-Apoteket).

23.november på Kulturhuset i Surnadal kl 1100-1300:
Møte med Åshild Ulstrup, Oslo / Sunnhordland. Ho er tidlegare NRK-journalist (jf ”Sånn er livet”), og har i tillegg gitt ut fleire bøker om alder og om kjærleik. Tittel på dette møtet er enda ikkje avgjort.