Ansvarleg ruspolitikk?

Kommunen har m.a. fått eit hovudansvar for at Alkohollovas formål blir følgt, der det heiter i formålsparagrafen:

§ 1-1. Lovens formål. Reguleringen av innførsel og omsetning av alkoholholdig drikk etter denne lov har som mål å begrense i størst mulig utstrekning de samfunnsmessige og individuelle skader som alkoholbruk kan innebære. Som et ledd i dette sikter loven på å begrense forbruket av alkoholholdige drikkevarer.

Det er all grunn til å vere bekymra over den måten dei fleste kommunestyra har oppfatta ansvaret sitt dei seinare åra. Det gjeld t.d. tildeling av og tildelingskriteriar for sals- og skjenkeløyve for alkohol, det gjeld opplæring, oppfølging og kontroll av at regelverket blir følgt, og det gjeld vurderingar av samanhengane i lokalsamfunnet mellom t.d. auken i alkoholbruk og veksten i illegal rusmiddelbruk, og samanhengane mellom rusmiddelbruken og veksten i psykiatri, sosialutgifter og rusbehandling . Og ikkje minst gjeld det dei store behova for for betre ettervern og barnevern, og samanhengane mellom rusmiddelbruk og fråfalls- og fråværsproblematikk i utdanning og arbeidsliv.

Actis, Rusfeltets samarbeidsorgan , er ein paraplyorganisasjon for 30 frivillige organisasjonar innanfor rusfeltet, dvs. organisasjonar som er opptatt av alkohol og/eller narkotika, og forebygging, behandling og ettervern. Actis består både av fråhaldsorganisasjonar og av organisasjonar for pårørande og tidlegare russkadde . Fylkesstyret i Møre og Romsdal oppfordrar veljarane til å ha ruspolitikken i mente ved kommune- og fylkestingsvalet 2011. Ein aktiv og kunnskapsbasert lokal rusmiddelpolitikk vil vere til fordel for kvar enkelt kommune og heile fylket.

For Actis,
Rusfeltets samarbeidsorgan i Møre og Romsdal
Eivind Hasle, Surnadal (leiar- til venstre)
Per Arne Lillebø, Sande (nestleiar - til høgre)

For fleire leserbrev kan du klikke på Leserinnlegg på Trollheimsporten.